Franca është prej ditësh nën pushtetin e shirave të rrëmbyeshëm, që kanë sjellë përmbytje në tërë vendin.
Lumi Sena në Paris arriti të enjten nivelin më të lartë në 30 vite, kurse sot pritet që të shkojë në gjashtë metra mbi nivelin e tij mesatar.
Dy muzetë e famshëm në dy anët e Senës, i Luvrit dhe i Orseit, i mbyllën përkohësisht dyert, për t’u dhënë mundësinë punonjësve t’i lëvizin që andej veprat e artit.
Qytete e qyteza në qendër të Francës po përjetojnë përmbytjet më të mëdha në më shumë se një shekull. Më shumë se 5.000 njerëz janë evakuuar që nga fundjava, e rreth 19.000 shtëpi janë pa energji elektrike.
Një 74-vjeçar u mbyt ditën e shkuar në jug të Parisit, duke shënuar viktimën e dytë nga përmbytjet. Një e moshuar do të gjendej e vdekur të mërkurën në shtëpinë e saj të përmbytur në një qendër të vogël të banuar në jugperëndim të kryeqytetit.
Përmbytjet në Francë dhe në Gjermani kanë lënë më së paku 11 të vdekur. Gjatë fundjavës parashikohet të vijojë e njëjta situatë në një hapësirë të madhe të Europës, nga Franca në Ukrainë. /tesheshi.com/
