Kryeprotagonisti i “Pronto”-s Adem Grabovci, bëhet i “gjallë” në ditën e katërt të fushatës, beson në fitoren e “Fillimit të Ri”

Ish-deputeti i PDK-së, Adem Grabovci, i njohur edhe si “shefi i shefave” në skandalin e përgjigjemeve “Pronto”, është bërë i gjallë në ditën e katërt të fushatës zgjedhore, duke dhënë përkrahjen e tij për partinë.

Grabovci i cili munogoi në hapjen zyrtare të fushatës në Prishtinë por edhe në tubimet e mëdha nëpër komuna, të shtunën është parë duke bërë fushatë në fshatrat Strellc të Deçanit dhe Devë të Gjakovës me kolegët e tij të partisë Besim Beqajn, Safete Hadergjonajn e Hajdar Beqa, dy të fundit kandidat për deputet.

Grabovci përmes dy postimeve në rrjetin social Facebook ka thënë se vizioni i kryetarit Veseli do të fitojë bindshëm.

“Strellci i Deçanit, fuqishëm i thotë PO #FillimitRi.
Vota për Kryetarin e PDK-së Kadri Veseli dhe kandidatën Safete Hadergjonaj, do të jetë votë e shumicës dërmuese të banorëve të këtij fshati.
Platforma zhvillimore e PDK-së dhe partive tjera të koalicionit, të cilën e paraqitëm së bashku me Besim Beqajn e Safete Hadergjonajn, mori mbështetje të plotë, si garantuese e zhvillimit të gjithanshëm të Kosovës dhe mirëqenies së qytetarëve të saj”.

“Në Devë të Gjakovës, së bashku me kandidatin për deputet Hajdar Beqa, morëm mbështetje të fuqishme për #FillimiRi. Vizioni dhe lidershipi i Kadri Veselit, po gjenë përkrahje gjithëqytetare. Fitorja bindëse është e pashmangshme”, ka thënë ai.

Kujtojmë se Grabovci është lënë jashtë listës për deputetë pasi po hetohet për skandalin e përgjimeve “Pronto”, ku dyshohet si person që ka bërë punësime të paligjshme në institucionet e vendit. /tesheshi.com/