Prokurori i Përgjithshëm Adriatik Llalla, duke folur sot në analizën vjetore të Prokurorisë së Durrësit, u shpreh se grupet kriminale nuk duhen lejuar të dalin mbi ligjin, ndërsa pranoi se në këtë qytet ka disa grupe, të cilat po sfidojnë hapur shtetin.
Sipas Kryeprokurorit, ngjarjet e rënda me të cilën është përballur ditët e fundit qyteti bregdetar i Durrësit, janë rrjedhojë e përplasjeve për trafikun e lëndëve narkotike, si edhe për përfitime të padrejta të pronës.
“Janë disa grupe kriminale që dyshohet se veprojnë në zonën e Durrësit, të cilët tashmë po tentojnë hapur të sfidojnë autoritetin e shtetit, për të realizuar qëllimet e tyre kriminale. Do të kërkoj, në radhë të parë nga Prokuroria e Durrësit, por më tej edhe nga gjithë prokuroritë e tjera si dhe Prokuroria për Krime të Rënda, që të bashkërendojnë veprimet e tyre me Policinë e Shtetit dhe me agjencitë e tjera ligjzbatuese, për të identifikuar plotësisht autorët e këtyre veprave penale”, u shpreh Llalla.
Ndër të tjera ai foli edhe për nevojën e zbardhjes së këtyre ngjarjeve, në mënyrë që të kthehet normaliteti dhe besimi tek institucionet i qytetarëve shqiptarë. /tesheshi.com/
