Mehmet Akarca është kryeprokurori i Republikës së Turqisë. Ka tre ditë që ndodhet në Tiranë, i ftuar nga homologu i tij shqiptar Adriatik Llalla.
Por zoti Akarca, një personalitet mjaft i njohur në vendin e tij në fushën e ligjit prej më shumë se 20 vitesh ka sjellë me vete një sërë dosjesh dhe materialesh, të cilat në fat prej kohësh ishin ngritur nga Ambasada e Turqisë, por nuk po gjenin zgjidhje.
Siç e kemi bërë publike më parë në tesheshi.com, ka kohë që Prokurorisë shqiptare i është dërguar një shkresë për personat, organizatat por edhe aktivitetet financiare të implikuar me grushtin e shtetit në Turqi, i cili realisht jo thjesht dështoi por u zmbraps nga fuqia popullore dhe institucionale e demokracisë turke. Eufemizëm? Aspak, një realitet tashmë i njohur institucional pasi të gjithë institucionet legjitime që nga Parlamenti, partitë politike, mediat shoqëria civile, pra instrumentet demokratie e refuzuan.
Dhe Shqipërisë, një nga vendet më shumë se mike për Turqinë i është kërkuar bashkëpunimi në hetimin e aktiviteteve të puçistëve. Por realisht nuk ka ndodhur gjë.
Por Ankaraja nuk ka thirrur me të madhe. Ajo po vepron institucionalisht. Dje kryeprokurori i Turqisë e ngriti këtë problem me Prokurorin e Përgjithshëm Adriatik Llalla.
Ndërsa sot Akarca, që mban gradën profesor doktor në jurispudencë është takuar me Xhezair Zaganjorin, kryetarin e Gjykatës së Lartë dhe një nga emrat më të njohur të jurisprudencës akademike në Shqipëri.
Siç bën të ditur në njoftimin e saj, Gjykata e Lartë, “Kryetari i Gjykatës së Lartë u shpreh i gatshëm për vijimësinë e këtij bashkëpunimi veçanërisht në trajtimin e çështjeve të përbashkëta penale. Ai theksoi dhe vlerësoi gjithashtu edhe bashkëpunimin e frytshëm dhe marrëdhëniet shumë të mira që ekzistojnë mes Akademisë Turke të Drejtësisë dhe Shkollës së Magjistraturës, në formimin e brezit të ri të gjyqtarëve. Gjatë diskutimeve, Z. Zaganjori e njohu Z. Akarca me funksionimin e sistemit të gjyqësorit në vendin tonë dhe Gjykatës së Lartë në veçanti, si dhe me proceset reformuese që po merren në sistemin e drejtësisë në tërësi”.
Por për ta bërë panoramën sa më të thjeshtë, drejtësia turke është origjina kryesore e hetimeve të EUROPOL mbi trafiun ndërkombëtar të drogës, kryesisht drograve të forta; heroinën dhe kokainën.
Heroina por edhe substancat e tjera dopate që kanë si bazë opiumin e që prodhohet me shumicë në zonat e konflikteve si Afganistani, Irani e Pakistani, por edhe Siria, përdorin Turqinë e në fund Shqipërinë si rrugë kalimi në Europë.
Por kohët e fundit, krimi ndërkombëtar po përdor zonën e Lindjes së Mesme edhe si rrugë për trafikimin ndërkombëtar të korainës latinoamerikane.
“Xibraka” e provoi këtë. Prokuroria turke është e famshme për hetimin pa kompromis të organizatave më të tmerrshme kriminale që prej vitesh kanë zhvendosur rrugën turke dhe po përdorur një rrugë tjetër që përdorën edhe një pjesë e madhe e refugjatëve që përfundonin në Kumanovë.
Ndaj Prokurori i Përgjithshëm i Turqisë, Mehmet Akarca gjatë takimit me kryetarin e Gjykatës së Lartë të Shqipërisë, Xhezair Zaganjori “garantoi se bashkëpunimi me Shqipërinë do të vijojë të forcohet edhe në të ardhmen, nëpërmjet shkëmbimit të vizitave studimore, organizimit të trajnimeve me tema që paraqesin interes të përbashkët si; lufta kundër trafiqeve të paligjshme, kundër terrorizmit, krimit të organizuar dhe atij kibernetik, etj.
Siç mësohet Akarca ka ngritur shqetësimin se organizatat kriminale që financojnë terrorizmin dhe që u pa edhe nga grushti i shtetit në Turqi përdorin rrugë të ndryshme.
Ndaj kryeprokurori turk ka theksuar nevojën e forcimit të bashkëpunimit rajonal e më gjerë, nisur nga rreziku i përhapjes së terrorizmit në Ballkan e në Evropë.
/tesheshi.com/
