Olsian Çela, kreu i ri i Prokurorisë së Përgjithshme, morri detyrën e re, një stafetë e marrë për koinçidencë, nga ish-shoqja e tij e kursit Arta Marku. Këtë detaj e zbuloi vetë kjo e fundit në dorëzimin e detyrës si Kryeprokurore e Përkohshme.
“Urime prokurorit të ri të përgjithshëm, kam besim se prokuroria do të ecë përpara. Jam shumë e lumtur që detyrën ia pasoj një ish-shoku tim të klasës”, tha Arta Marku, e cila e mbajti dy vjet këtë detyrë, duke u bërë dhe shkak, jo ajo por emërimi i saj, për një krizë të thellë politike.
Ndërsa Kryeprokurori i ri Olsian Çela, e nisi detyrën duke përcjellë mesazhin e një epoke të re që duhet të vijë me të në krye të organit të akuzës.
“Sot ne ndodhemi në një fazë të vështirë. Vendi po përballet me një krizë për shkak të ngjarjeve të fundit të muajit nëntor. Përgjigja që prokuroria duhet të japë në rastin konkret duhet të spikasë në raport me atë që po bëjnë institucionet e tjera, pasi njerëzit kërkojnë drejtësi, dhe gjërat të bëhen konkrete. Është një rast që jemi në lartësinë e asaj që pret vendi dhe njerëzit presin”, tha Çela. /tesheshi.com/
