Kryeprokurori i Zyrës së Prokurorisë Speciale, David Schwendiman, i cili do t’i hetojë ish-komandantët e UÇK-së, në një konferencë me gazetarë në Hagë, që mbajti sot, tha se hetimet do t’i zhvillojë pa frikë dhe pa asnjë favor.
Schwendiman tha se është i vetëdijshëm për ndjeshmërinë politike të asaj çfarë po bën, por në punën e tij do të udhëhiqet vetëm nga faktet dhe nga ligji.
“Kushdo që flet në publik dhe përmend informata të mundshme të prokurorisë, nuk e thotë të vërtetën. E vërteta është ajo që ai do të përgjigjet në të ardhmen dhe ajo që do të jetë pjesë e e aktakuzës që do të publikohet ndërkohë”, tha Schwendiman.
Megjithëse në konferencën e sotme në Hagë, kryeprokurori Schwendiman nuk tha se kur mund të priten paditë e para, besohet se kjo mund të ndodh në pjesën e parë të vitit të ardhshëm.
Dhomat e specializuara do të trajtojnë cështjet që dalin nga raporti i Dick Martit, që u shndërrua në raport të Këshillit të Evropës, e që “fajëson ish-pjesëtarë të UCK-së, për krime lufte përfshirë edhe trafikim të organeve njerëzore”.
Gjykata Speciale do të merret me akuzat për krime gjatë viteve 1999-2000, të ngritura ndaj pjesëtarëve të Ushtrisë Çlirimtare të Kosovës.
Ajo financohet nga Bashkimi Evropian dhe vepron në përputhje me ligjet e Kosovës. /tesheshi.com/
