Në Katedralen e St. George në Cape Town u bë varrimi i një prej luftëtarëve më të famshëm kundër aparteidit, Kryepeshkopit Desmond Tutu, i cili u nda nga jeta të dielën e kaluar në moshën 90-vjeçare. Varrimi ishte aq modest sa dëshironte vetë Tutu. Në kujtim të tij gjatë javës u mbajtën shumë ceremoni zie në mbarë vendin.
Tutu ishte i njohur, ndër të tjera, për modestinë e tij, ndaj donte një ceremoni të thjeshtë varrimi, duke përfshirë arkivolin më të lirë dhe donacionet për bamirësi në vend të qirinjve dhe luleve.
Ai gjithashtu vendosi që trupi i tij të digjej me një procedurë të veçantë, miqësore me mjedisin, të quajtur aquamation, dhe që hiri i tij tij të ruhej pas foltores në katedrale, aty ku shërbeu si kryepeshkop për 35 vjet, raporton BBC.
Në funeralin morën pjesë një numër personalitetesh, duke përfshirë ish-presidenten irlandeze Mary Robinson dhe të venë e Nelson Mandelës, Graco Machel, dhe të venë e
presidentit të fundit të aparteidit të Afrikës së Jugut, Frederick Willem de Klerk, i cili vdiq në nëntor. Megjithatë, për shkak të moshës së tij të shtyrë dhe kufizimeve, një nga miqtë më të mirë të Tutu, Dalai Lama, nuk udhëtoi në Afrikën e Jugut.
Desmond Tutu konsiderohej si një nga luftëtarët më të famshëm ndaj aparteidit të Afrikës së Jugut përkrah Nelson Mandelës. Për punën e tij në vitin 1984, ai mori Çmimin Nobel për Paqen. Në vitin 1986, ai u bë Kryepeshkopi i parë me ngjyrë anglikan i Cape Town. Ndër të tjera, ai ishte një avokat i së drejtës për eutanazi dhe të drejtave të homoseksualëve, prandaj shumë nuk ishin dakord me të, transmeton STA. /tesheshi.com/
