Nën organizimin e kryetarit të Kuvendit të Republikës së Kosovës, Kadri Veseli, sot në Prishtinë u mbajt tryeza e punës “Ecuritë në transformimin e ‘Trepçës’”, në të cilën morën pjesë drejtues të tjerë të lartë të institucioneve, kryeministri Mustafa, ministra, deputetë të Kuvendit, ekspertë të njohur vendorë e ndërkombëtarë.
Me këtë rast, Veseli e vuri theksin te nevoja e një konsensusi të brendshëm lidhur me “Trepçën”, i cili do të mbështetej në disa pika.
Veseli, fillimisht theksoi se do të duhej të ketë një participim të sektorit privat në “Trepçë”, pa pjesëmarrje substanciale të të cilit nuk mund të ketë rivitalizim të prodhimit, të minerave dhe të metalurgjisë.
“Kujdesi ndaj punëtorëve dhe komunitetit përreth kësaj industrie do të duhej të ishte maksimal. Këta punëtorë kanë sakrifikuar gjithçka nga vetja e tyre, jo vetëm për këtë industri. Për më tepër, ata ishin pararendës në çdo iniciativë për lirinë e vendit. Prandaj, ne duhet të jemi të ndjeshëm ndaj këtij procesi. Ndoshta do të duhet konsideruar edhe mundësia që një pjesë e aksioneve të ‘Trepçës’ t’u takojnë atyre”, theksoi kreu i Kuvendit.
Ai shtoi se një kujdes i veçantë i duhet kushtuar edhe mjedisit, duke nënvizuar se “Trepça” është shfrytëzuar në mënyrë të pamëshirshme.
“Edhe ashtu kreditori me i madh në ‘Trepçë’ është qeveria e Kosovës dhe punëtorët e saj. Të tjerat do të duhet trajtuar me kujdesin më të madh, meqenëse kanë qenë në kohë të errëta dhe me shumë dilema, të ndërlidhura me regjimin e Milosheviqit. Prandaj, na duhet një ekip më i mirë i ekspertëve ligjorë për ta mbrojtur kauzën tonë. Kështu që në këtë strategji ne duhet të mendojmë urgjentisht për këtë punë. Në fakt, ndoshta do të duhej të ngrinim padi për dëmet që i janë shkaktuar ‘Trepçës’ dhe mjedisit përreth,” ka thënë kryetari Veseli. /tesheshi.com/
