Al Jazeera njofton se kryengritësit sirianë kanë nisur një ofensivë për të çarë rrethimin e pjesës lindore të Halepit, të kryer nga forcat qeveritare e prej së cilit besohet të kenë mbetur në çark rreth 300.000 njerëz.
Ushtria siriane po ashtu e ka pohuar në median shtetërore nisjen e ofensivës, duke shtuar se rebelët janë zmbrapsur nga një bazë artilerie e forcave ajore.
Observatori Sirian për të Drejtat e Njeriut ka informuar se rebelët dhe forcat qeveritare po ndeshen në disa fronte në rrethinat e Halepit.
Një qendër e komandës ushtarake të kryengritësve bëri me dije se në orët e para të betejës për çarjen e rrethimit qenë marrë pozicione në pjesën jugperëndimore të qytetit, ku kontrollin e kanë forcat e regjimit të Esadit.
Forcat qeveritare do ta izolonin në fillim të korrikut rrugën e fundit për në atë pjesë të Halepit të kontrolluar nga kundërshtarët e regjimit. Shtënia në dorë e tërë Halepit do të ishte fitorja më e madhe e Beshar Esadit në tërë këto vite luftë.
Ndërkaq, forcat siriane dhe ruse shpallën hapjen e korridoreve të sigurisë, përmes së cilëve mund të largoheshin banorët e zonave të rrethuara. Megjithatë, sipas qeverisë ruse, vetëm 169 civilë janë larguar nga e shtuna.
I dërguari i posaçëm i OKB-së për Sirinë, Staffan de Mistura, paralajmëroi të premten se gjërat bazë të jetesës mund të mbaronin brenda tre javësh në pjesën lindore të Halepit, tashmë të rrethıar. /tesheshi.com/
