Muhammed Allushi, përfaqësuesi i kryengritësve të Xhejshul Islamit në Komitetin e Lartë të Negociatave, është tërhequr nga bisedimet e Gjenevës për shkak të dështimit të tyre për t’i dhënë fund konfliktit të përgjakshëm pesëvjeçar në Siri.
Si kryenegociator i bllokut opozitar në këto bisedime, Allushi deklaroi të dielën se po tërhiqej ngase nuk ishte arritur të kishte një marrëveshje politike për krizën siriane.
Veç kësaj, këto bisedime nuk kishin sjellë as lirimin e mijëra të burgosurve të dergjur në burgjet e regjimit të Beshar Esadit.
“Bisedimet e paqes nuk ia dolën ta ndalojnë gjakderdhjen e popullit tonë, nuk ia dolën të sigurojnë lirimin e mijëra të burgosurve, apo që ta shtyjnë Sirinë drejt një tranzicioni politik pa Esadin dhe bandën e tij kriminale,” deklaroi ai.
Komiteti i Lartë i Negociatave e pati pezulluar në prill përfshirjen në negociatat jo të drejtpërdrejta me një delegacion të qeverisë siriane me ndërmjetësinë e OKB-së.
“Tre raundet e bisedimeve ishin të pasuksesshme për shkak të kokëfortësisë së regjimit dhe të agresionit e bombardimeve të vazhdueshme kundër popullit sirian,” ka thënë Muhammed Allushi.
Në fakt, Komiteti i Lartë i Negociatave kishte kohë që po e shprehte zhgënjimin me përparimin e munguar të bisedimeve të Gjenevës.
Allushi i ka bërë dhe një thirrje komunitetit ndërkombëtar. “Bashkësia ndërkombëtare duhet të ushtrojë presion serioz mbi Rusinë dhe Esadin për të ndaluar vrasjen e popullit tonë.”
Dorëheqja e tij mund të nxisë dhe largime të tjera, për ta bërë më të dukshme dështimin e bisedimeve të Gjenevës. /tesheshi.com/
