Me një letër të firmosur nga Theresa May e që sot do t’i dorëzohet presidentit të Këshillit të Europës, Donald Tusk, do të nisë zyrtarisht dhe largimi i Britanisë nga BE-ja.
May vë në lëvizje kështu nenin 50 të Traktatit të Lisbonës, duke nisur një proces dyvjeçar të daljes nga unioni, të detyruar nga rezultati i referendumit të qershorit të shkuar.
Letra e firmosur nga kryeministrja britanike do të dorëzohet sot në mesditë dorazi nga ambasadori i Britanisë në BE, Tim Barrow.
Në një fjalë që pritet të mbajë po sot, May do t’u kërkojë britanikëve të bashkohen, si dhe do të premtojë se do të përfaqësojë në negociatat e daljes nga BE-ja çdo person në Mbretërinë e Bashkuar, të ri e të moshuar, të pasur e të varfër.
Një takim më 29 prill i 27 udhëheqësve të vendeve të BE-së do t’i japë Komisionit Europian një mandat për të negociuar me Britaninë mbi procesin e largimit. Mes majit dhe qershorit planifikohet të nisin negociatat.
“Sot Britania hedh hapin në të panjohurën,” lexohet në krye të faqes elektronike të The Guardian-it. /tesheshi.com/
