Kryeministri i Kosovës, Isa Mustafa ka preferuar ta përcjellë në publik një çast lumturie politike, duke rrëfyer në FB bisedën që ka patur me kryetarin e Partive Popullore të Evropës, Joseph Daul.
“Ai, derisa unë flisja, u ngrit nxori një hartë nga sirtari e vuri para nesh dhe më tha, shihe Kosova është mjedis Evrope, por problemi ynë është që ne të kujdesemi bashkërisht për Evropën”.
Dhe këto fjalë, Mustafa i ka kuptuar kështu: Daul dëshironte të shtonte se ka nevojë të ketë edhe sa më shumë Evropë në Kosovë, sikurse edhe Kosovë në Evropë.
Më tej, shefi i qeverisë së Kosovës thotë se e ka falënderuar z. Daul për përkrahjen e vazhdueshme që i ka dhënë ai dhe PPE-ja, integrimeve evropiane dhe procesit të liberalizimit të vizave, transmeton Koha.net.
“Gjatë takimit që pata këtë jave me z. Joseph Daul, kryetar i Partive Popullore Evropiane (EPP), aty ku është anëtare LDK-ja, iu falënderova për përkrahjen e vazhdueshme të tij dhe të EPP-së për integrimet evropiane të Kosovës dhe veçmas për procesin e liberalizimit të vizave”, ka shkruar Mustafa. /tesheshi.com/
