Parlamenti uzbekistanas miratoi këtë të enjte vendimin për të emëruar kryeministrin Shevket Mirzijojev si president të përkohshëm të vendit pas mbetjes bosh të postit me vdekjen e Islam Karimovit.
Detyra që ai pritet të kryejë do të jetë e përkohshme, pasi brenda tre muajve do duhet të mbahen zgjedhjet presidenciale.
Në përputhje me kushtetutën e vendit, detyra e presidentit të përkohshëm i takon kryetarit të Senatit, por ai u tërhoq, duke e quajtur kryeministrin kandidat më të përshtatshëm për shkak të përvojës së gjatë.
Shevket Mirzijojev është bërë kryeministër në vitin 2003, dhe të gjitha gjasat janë që ai të zgjidhet president në zgjedhjet e ardhshme.
Islam Karimov, presidenti i parë dhe i vetëm i Uzbekistanit që prej shpalljes së pavarësisë, vdiq javën e shkuar në moshën 78-vjeçare. /tesheshi.com/
