“Thelbi i problemeve tona nuk është thjesht politik. Eshtë etik!” Kështu është shprehur kryeministri ukrainas Arseniy Yatsenyuk, duke lajmëruar dorëheqjen e tij.
Ai do ta paraqesë zyrtarisht të martën dorëzimin e detyrës, në mes të një krize politike në vendin e tij. “Nuk mund ta lëmë qeverinë të destabilizohet kur vendi është në luftë,” ka thënë Yatsenyuk në një paraqitje televizive.
Ai ka kërkuar formimin e një qeverie të re, për të lajmëruar më pas se Volodymyr Groysman, drejtuesi i parlamentit, është ngarkuar me detyrën e krijimit të kabinetit pasues.
Sipas anketimeve, dorëheqja e Yatsenyuk-ut nuk përbën një surprizë, pasi ai mezi i mbijetoi një votëbesimi në shkurt në parlament. Presidenti i vendit, Petro Poroshenko do t’ia kërkonte asokohe dorëheqjen me arsyetimin e humbjes së mbështetjes.
Edhe pse mori kryesimin e qeverisë dy vite të shkuara me premtimin për të luftuar korrupsionin, kryeministri në ikje është akuzuar dendur për korrupsion, edhe pse deri tani nuk ka prova konkrete për të. /tesheshi.com/
