Mosuli, qëndrimi i trupave turke në Bashika, plani për operacionin në Mosul për largimin e ISIS-it, janë kthyer në çështje qendrore në rajon, duke i përplasur përmes deklaratash dhe autoritetet turke e irakiane.
Kryeministri i Turqisë, Binali Jëlldërëm, ka paralajmëruar se çdo ndryshim i demografisë në Mosul mund të çojë në një luftë të re civile.
“Mosuli i përket popullit të Mosulit. Mos i lini të huajt brenda e të shkatërrojnë strukturën origjinare demografike të qytetit, që mund të çojë në një luftë të re civile.”
Ai ka pranuar se Turqia pajtohet me planin amerikan për marrjen e qytetit prej ISIS-it.
“SHBA-të kanë një plan [për një operacion] të drejtuar nga qeveria irakiane për ta pastruar qytetin nga elementët e ISIS-it. Ne themi: e mbështesim këtë plan,” ka deklaruar kryeministri turk.
Binali Jëlldërëm ka theksuar më herët se trupat turke do të vazhdojnë të qëndrojnë në Bashika, e se synimi është ruajtja e demografisë së rajonit, posaçërisht e Mosulit.
Në përplasjen e fundit irakiano-turke, kryeministri irakian, Hajdar el-Abadi, e ka përjashtuar mundësinë që Turqia të ketë një rol në ofensivën e pritshme në Mosul.
“Forcat turke nuk do të lejohen të marrin pjesë assesi në çlirimin e Mosulit.”
Prej ditësh ka një tensionim të situatës midis Irakut dhe Turqisë, të pasuar nga deklarata që paralajmërojnë kohë jo të mira në marrëdhëniet mes dy vendeve. /tesheshi.com/
