I gjendur në Londër, në një konferencë donatorësh për Sirinë, Ahmed Davutogllu ka paralajmëruar për një valë të re refugjatësh, ndërsa mijëra sirianë janë nisur drejt Turqisë.
Ofensiva e fundit ushtarake e forcave të regjimit të Esadit ka bërë që sirianë të panumërt të nisen drejt kufirit turk.
“Rreth 10.000 refugjatë po presin në kufirin turk për shkak të sulmeve ajrore në Halep. Diku te 60.000 deri në 70.000 njerëz që janë në kampet në veri të Halepit po lëvizin drejt Turqisë,” tregoi kryeministri turk.
“Jam duke menduar se ku dhe si do t’i vendosim njerëzit që vijnë nga Siria,” u shpreh Davutogllu, duke nënvizuar njëkohësisht se asnjë nuk do të mbetet pa strehë, siguri e ushqim në Turqi.
Kryeministri turk tha se vendi i tij kishte harxhuar gjer tani 10 miliardë dollarë për sirianët e vendosur në kampet e refugjatëve.
2.5 milionë refugjatë sirianë gjenden aktualisht në Turqi, dhe një marrëveshje me BE-në parashikon dhënien e tre miliardë eurove në shkëmbim të frenimit të refugjatëve që të lëvizin drejt vendeve europiane. /tesheshi.com/
