Me normalizimin e marrëdhënieve me Rusinë e Izraelin, në politikën turke u dhanë shenjat dhe për një përmirësim të tyre me Sirinë e Irakun. Qe kryeministri i Turqisë, iniciatori i kësaj qasjeje të re, që e bëri të njohur këtë në një fjalë të pak ditëve më parë.
Por po vetë ai ka hequr çdo dyshim se mund të ketë ndonjë ndryshim të politikës turke ndaj Sirisë për sa kohë që në pushtet është Beshar Esadi.
“Asgjë nuk do të ndryshojë në [politikën] e Turqisë për sa kohë që nuk zëvendësohet Esadi. Ai është faktori kryesor pse gjërat janë kësisoj,” ka thënë kryeministri turk, Binali Jëlldërëm, në një intervistë për BBC-në.
“Në njërën anë është Esadi, e në anën tjetër DAESH-i. Nëse do të pyesnit kë do të parapëlqenim, nuk mund të zgjedhim njërin apo tjetrin. Të dy palët duhet të shkojnë. Problemi nuk mund të zgjidhet derisa të jetë Esadi; një tjetër grup terrorist do të dalë.”
Kryeministri turk e ka akuzuar regjimin e Esadit për krijimin e DAESH-it përmes politikës së vrasjes së qytetarëve të vet. /tesheshi.com/
