Zgjatja e dytë e gjendjes së jashtëzakonshme në Turqi do të marrë fund më 19 prill, duke lënë të hapur mundësinë që ajo të vazhdojë dhe më tej teksa vendi euroaziatik vijon të luftojë strukturat që gatuan përpjekjen e dështuar për grusht shteti të 15 korrikut 2016.
Në një takim në Ankara me përfaqësues të mediave të huaja, kryeministri turk, Binali Jëlldërëm, ka deklaruar se është Këshilli i Sigurisë Kombëtare që do të vendosë nëse do të ketë një zgjatje tjetër të gjendjes së jashtëzakonshme.
“Nëse gjendja e jashtëzakonshme do të zgjatet, kjo do të vlerësohet në Këshillin e Sigurisë Kombëtare, dhe vendimi do të merret në përputhje me këtë.”
Gjendja e jashtëzakonshme u deklarua fillimisht në Turqi më 20 korrik, pesë ditë pas përpjekjes së përgjakshme për grusht shteti, prej së cilës humbën jetën qindra njerëz.
Ajo u zgjat me tre muaj më 11 tetor, me një tjetër zgjatje të përsëritur më 3 janar.
Turqia përgatitet të mbajë në mes të prillit referendumin mbi ndryshimet kushtetuese që do ta shndërrojnë sistemin qeverisës në presidencial, duke hapur rrugën për më shumë qëndrueshmëri e siguri në vend. /tesheshi.com/
