Një numër i madh akademikësh turq, të grupuar nën emërtimin “Grupi i Akademikëve për Paqe”, kanë nënshkruar një peticion ku kërkojnë ndalimin e operacioneve të forcave të sigurisë në juglindje të vendit, e gjithashtu i kanë përshkruar ato në shkelje të të drejtave të njeriut, si një “masakër”.
18 apo më shumë prej tyre janë arrestuar sot në Koxhaeli e Bursa, me akuzat për propagandë terroriste e për nxitje të urrejtjes dhe armiqësisë.
Ahmet Davutogllu, kryeministri turk, ka folur sot mbi peticionin e akademikëve, duke theksuar, “Çdokush ka të drejtën të mbrojë një ide, por ata nuk mund ta përligjin terrorizmin dhe urrejtjen brenda kontekstit të lirisë së fjalës.”
“Akademikët që nënshkruan peticionin po përligjin ndërtimin e barrikadave nga terroristët e PKK-së,” kanë qenë fjalët e shefit të qeverisë turke.
Më i ashpër është treguar presidenti i vendit, Rexhep Tajjip Erdogan, i cili pasi ka kryer faljen e së premtes në Xhaminë Blu e ka vënë lule në vendin ku u vranë 10 persona ditë të shkuara, ka gjetur rastin të flasë për nismën e akademikëve:
“I dënoj njerëzit që e nxorën dhe e nënshkruan atë peticion. Titujt e tillë si profesor apo docent nuk i bëjnë ata të urtë… Ata janë njerëzit më të zinj. Janë mizorë, sepse ata që bëjnë alencë me mizorinë janë vetë mizorë… Ata që qëndrojnë në krah të kryerësve të masakrave janë palë me krimin.”
Pas një armëpushimi dyvjeçar, PKK-ja, organizata terroriste kurde, ka rinisur aksionet luftarake që prej korrikut të vitit të shkuar. Situata në juglindje të Turqisë prej kohësh është e tensionuar, ndërsa forcat turke të sigurisë kanë ndërmarrë operacione në një pjesë të territorit për eliminimin e terroristëve të PKK-së.
Një sulm i këtyre të fundit të mërkurën në provincën e Dijarbakërit la të vdekur pesë civilë, tre prej të cilëve fëmijë, si dhe një punonjës policie. 39 të tjerë u plagosën, përfshirë gjashtë policë. /tesheshi.com/
