Binali Jëlldërëm, kryeministri i ri i Turqisë, u është përgjigjur pyetjeve të gazetarëve në një paraqitje të gjatë televizive në transmetuesin shtetëror TRT. Mes shumë temave, është folur dhe për përmirësimin e marrëdhënieve me Rusinë, Izraelin e Egjiptin.
“Presidenti ynë do të ketë sot, nesër, mbase të mërkurën, mbase të enjten, një bisedë telefonike me Putinin,” ka bërë të ditur ai.
Në lidhje me letrën e dërguar palës ruse, posaçërisht presidentit rus, Jëlldërëm ka theksuar, “Përmbajtja e letrës është shumë e qartë. Ne shprehim keqardhjen tonë. Ne themi se ndajmë dhimbjen e ndjerë nga ata që humbën të dashurit e tyre. Ne themi se do të paguajmë dëmshpërblim nëse është e nevojshme.”
Marrëdhëniet dypalëshe duhet t’i kthehen normalitetit, ka qenë i mendimit shefi i ekzekutivit turk. “Pala tjetër e miraton këtë,” shton i lartpëmenduri.
Sa i përket përmirësimit të marrëdhënieve me Izraelin, kryeministri turk pohoi se marrëveshja përkatëse do të nënshkruhet formalisht ditën e sotme.
“Kjo marrëveshje ka marrë një kohë të gjatë. Çështja jonë me Izraelin ishte kërkimi i faljes dhe dëmshpërblimi, por presidenti ynë nuk e tkurri atë. Qendra fundamentale e gravitetit të marrëveshjes është çështja palestineze.”
Erdogani do të bënte të ditur dje se më shumë se dhjetë mijë tonë furnizime do të arrinin në Gaza nga Turqia përpara Bajramit, festës së besimtarëve muslimanë në mbyllje të muajit të shenjtë të Ramazanit.
Në lidhje me Egjiptin, Binali Jëlldërëm u tha gazetarëve se marrëdhëniet do të nisin në nivel ministerial. “Nuk ka pengesa. Ne jemi gati, nuk kemi rezerva.”
I pyetur nëse do të ketë vizita të ndërsjellta ministrash, kryeministri është përgjigjur, “Reciprokisht. [Ministrat] e Egjiptit do të vijnë, tanët do të shkojnë. Afaristë mund të vijnë, shkëmbimet kulturore janë të mundshme, mund të ketë kontakte reciproke ushtarake. Të gjitha janë të mundura, nuk ka asnjë problem.”
Që pas marrjes së detyrës së kryeministrit nga Binali Jëlldërëm, politika turke po sheh një kthesë të madhe në marrëdhëniet me ato vende ku ka ngecje apo ftohje të tyre. Hapat e tillë i detyrohen dhe situatës së përgjithshme në rajon e më gjerë. Përmirësimi i marrëdhënieve me Rusinë, Izraelin e Egjiptin shënon hapjen e një faqeje të re në diplomacinë e vendit euroaziatik. /tesheshi.com/
