Një rezolutë që i cilëson “gjenocid” vdekjet e armenëve në vitin 1915 pritet të kalojë sot në parlamentin gjerman.
Prej ditësh ka një tension të shtuar mes Turqisë dhe Gjemanisë për miratimin e kësaj rezolute. Turqia nuk do assesi që kjo rezolutë të marrë miratimin e deputetëve gjermanë, ndryshe kjo do të ketë ndikim në marrëdhëniet reciproke.
Binali Jëlldërëm, kryeministri i sapozgjedhur turk, ka deklaruar sot se do të qe diçka irracionale nëse kjo rezolutë miratohet.
“Kjo votë në Berlin do të jetë një provë e miqësisë midis dy aleatëve,” ka thënë ai.
Ndërsa ditë më parë, zëvendëskryesministri turk e paralajmëroi Gjemaninë që të veprojë me kujdes mbi këtë çështje.
Kancelarja gjermane Angela Merkel nuk do të marrë pjesë në votim. Kështu ka njoftuar zëdhënësja Christiane Wirtz. Kur është pyetur nëse kancelarja e miraton rezolutën, zëdhënësja ka deklaruar: “Ajo [Merkel] më tha këtë mëngjes se ishte në krah të grupit të saj parlamentar.”
Turqia është shumë e ndjeshme rreth kësaj çështjeje. Për të, nuk ka patur kurrsesi një “gjenocid” ndaj armenëve. Miratimi i mundshëm i kësaj rezolute nga parlamenti gjerman do t’i fuste pa dyshim në një spirale krize marrëdhëniet mes dy vendeve. /tesheshi.com/
