Kryeministri turk Binali Yildirim ka deklaruar sot se askush nuk mund të thejë Turqinë, dhe më pas falendëroi vendet mike për mbështetje, pas tentimit për grusht shtet gjatë natës së kaluar.
Ai deklaroi se janë arrestuar 2.839 ushtarë.
“Duhet t’i falenderohemi Zotit për shkak se kemi mposhtur njerëzit të cilët kanë nisur këto probleme të rrezikshme. Tentimi për grusht shtet dhe gjithë ajo që ka ndodhur natën e kaluar, nuk është kryer me vendim të komandës së forcave të sigurisë, por gjithë kjo ka ndodhur nga një grup i vogël njerëzish të cilët kanë dëshiruar të realizojnë synimet e tyre. Ajo në fakt paraqet një strukturë paralele brenda forcave të armatosura”, ka thënë Yildirim gjatë një adresimi për gazetarë në Ankara.
“Komandantët dhe zyrtarët tonë të nderuar meritojnë çdo lëvdatë, për faktin se për asnjë moment nuk kanë humbur shpresën dhe për shkak se kanë ngadhnjyer ndaj atyre që kanë ndërmarrë këtë veprim. Dëshiroj të falendëroj me këtë rast gjithë qytetarët tanë, partitë politike dhe organizatat joqeveritare”, ka thënë Yildirim.
Ai ka falendëruar të gjithë pjesëtarët e forcave të sigurisë, të forcave speciale, gjithë ata që kanë qëndruar krah për krah në luftën kundër kësaj përpjekjeje frikacake, siç është shprehur.
“Të dashur qytetarë, ajo që kemi përjetuar tregon një gjë, e ajo është se Turqia ka përvojë kogja të mirë në demokraci, dhe kjo na tregon që demokracia është e rëndësishme për vendin tonë dhe lirinë tonë. Gjithashtu, kamdëshirë të falendëroj të gjithë vendet mike të cilat kanë shprehur mbështetjen dhe miqësinë me popullin tonë.
Këto ditë njerëzit kanë treguar trimëri të madhe në ndalimin e këtij akti të tmerrshëm. Ata të cilët kanë tentuar të kryejnë grusht shteti duhet të kuptojnë më në fund se askush nuk mund të thyejë këtë komb”, ka thënë Yildirim, duke cekur se “do të ndërmerren të gjitha hapat e duhur kundër organizatës terroriste FETO pa asnjë hezitim”.
Ai ka thënë se nuk ekziston dënim me vdekje në Turqi, por se autoritetet do të marrin në konsideratë ndryshimet legjislative për të parandaluar ngjarje të tilla si tentim për grusht shtet ushtarak.
Ai ka shtuar se cilido shtet që mbështet Fetullah Gylenin do të konsiderohet armik i Turqisë dhe do të jetë në luftë me Ankaranë.
“15 korriku është festë jonë e demokracisë, andaj ta gëzojmë atë”, ka përfunduar kryeministri turk.
