Robert Fico, kryeministri i Sllovakisë, i njohur për polemikën që ndezi më herët këtë vit, kur, në kuadër të risistemit të refugjatëve, deklaroi se vendi i tij do të parapëlqente refugjatë të krishterë, nuk ka patur druajtje fare të thotë se qeveria e tij po vëzhgon çdo musliman.
Pjesëmarrës në debatin politik në kanalin televiziv informativ TA3, Fico ka theksuar: “Ne vëzhgojmë çdo musliman në Sllovaki.”
“Në pjesën më të madhe të rasteve, ata janë këtu legalisht. Ne komunikojmë me të gjithë personat që mund të hedhin dritë mbi informacione thelbësore,” ka shtuar ai.
Kryeministri sllovak i ka kundërshtuar pandërprerë kuotat e detyrueshme të rishpërndarjes së emigrantëve. Ai ka kujtuar gjithashtu se nga 1 korriku i vitit të ardhshëm, kur Sllovakia të kryesojë Këshillin e Bashkimit Europian, kanë për t’u aprovuar masa më të rrepta sigurie.
Në një tjetër televizion, në Markíza TV, Fico do të thoshte më 15 nëntor se, “Ne e respektojmë faktin se ka një krizë emigracioni, por qytetarët sllovakë dhe siguria e tyre kanë më përparësi se të drejtat e emigrantëve.”
Përgjigjja për komentet e kryeministrit sllovak ka ardhur nga zëdhënësi i Fondacionit Islam të Sllovakisë, që e ka kritikuar atë për paraqitjen e muslimanëve si një kërcënim. “Fico nuk tha se po vëzhgonin çdo radikal apo ekstremist. Në vend të kësaj, ai la të kuptohej se ca nga qytetarët e Sllovakisë, pa ndonjë vendim gjykatë apo akuzë policore, përfaqësojnë një kërcënim për shkak të fesë së tyre.”
Në Sllovaki ka rreth 5.000 muslimanë, por Islami nuk është i regjistruar zyrtarisht si fe, e nuk ka xhami zyrtare. /tesheshi.com/
