Edhe një herë tjetër kryeministri sllovak, Robert Fico, ka shprehur qëndrimin e vendit të tij kundër sistemit të kuotave të detyrueshme të pranimit të refugjatëve, duke e vënë theksin në mënyrë specifike te mungesa e plotë e gatishmërisë për t’u hapur dyert refugjatëve muslimanë.
“Ne nuk jemi vetëm kundër sistemit të kuotave të detyrueshme, por gjithashtu kundër çdo vendimi që hap rrugën për formimin e bashkësive muslimane,” ka deklaruar ai mes të tjerash.
Duke e shfaqur hapur qëndrimin kundër të ardhurve muslimanë, Fico ka shtuar, “Multikulturalizmi është vetëm një ëndërr. Nëse i lini emigrantët të hyjnë në vend, ju pa dyshim do të ndesheni me probleme të tilla si ato që kanë ngjarë në Francë apo Gjermani. Por ne jemi të vendosur ta mbrojmë vendin tonë.”
Ndërsa në mars do të zhvillohen zgjedhjet e përgjithshme, pritet që në Sllovaki të ketë një shtim të ligjërimit kundër pritjes së refugjatëve.
169 refugjatë pranoi Sllovakia vitin e shkuar, vetëm 20 prej të cilëve ishin muslimanë. 5.000 është numri i muslimanëve që jetojnë në Sllovaki. /tesheshi.com/
