Kryeministri i ardhshëm turk, Binali Yildirim ka deklaruar sot, se do të vazhdojë luftën kundër Shteti Islamik dhe ekstremistëve kurdë në Turqi por edhe në Siri, duke shtuar se ndërrimi në qeveri nuk do të ndryshojë luftën kundër grupeve terroriste.
Ai ka shtuar se Bashkimi Evropian duhet t’i japë fund konfuzionit në lidhje me politikën e tij ndaj emigrantëve dhe se Turqia duhet të dijë se çfarë mendimi ka BE në lidhje me këtë çështje.
Në kongresin e Partisë qeveritare AKP, Yildirim u shpreh se Turqia do të vazhdojë të punojë në rregullimin e masave për përmirësimin e gjendjes së të drejtave njerëzore dhe demokracisë, pa marrë parasysh se a do të anëtarësohet në Bashkimin Evropian apo jo.
Ministri i deritashëm i Komunikacionit Binali Yildirim, sot formalisht do të emërohet kryetar i Partisë për Drejtësi dhe Zhvillim (AKP) dhe kryeministër i Turqisë, lajmëron AFP, duke vlerësuar se me këtë do të përforcohet ndikimi në qeveri, të cilën e ka mentori i Yilderim, Presidenti turk Recep Tayyip Erdogan.
Yildirim, mik shumëvjeçar i Erdoganit, është kandidati i vetëm në Kongresin e jashtëzakonshëm të partisë, në të cilin do të përzgjidhet kryetari i partisë, i cili njëherësh i bie të jetë edhe Kryeministër i vendit.
Detyra e tij kryesore, thonë analistët, do të jetë zbatimi i ndryshimeve kushtetuese, me qëllim transformimin e Turqisë nga sistemi parlamentar në atë presidencial, ku Erdogan do të fitonte autorizime më të mëdha. Yildirim do të zëvendësojë në krye të qeverisë, Kryeministrin e deritashëm Ahmet Davutoglu./tesheshi.com/
