Kryeministri Rama inspektoi këtë pasdite Lungomaren e Vlorës, atë që tashmë është bërë legjendë nga vonesa e përfundimit.
Rama tha se “të gjithë ata të paduruar që lëshojnë romuze për projektin, shumë shpejt do thonë që nuk isha unë ai që u shpreha”.
Por ajo që u veçua në deklarimet e Ramës ishte sqarimi mbi rrugën me dy korsi përgjatë Ujit të Ftohtë, e cila kësaj vere ka qenë ferri vetë për pushuesit, si shkaktare e krijimit të radhëve të gjata të trafikut.
Për Ramën, rruga do jetë po ajo, pasi siç tha, “me plotësimin e infrastrukturës mbrapa do të çlirohet gjithë pjesa përpara sepse nuk është një rrugë për të përshkuar atdheun, por është një rrugë shëtitoreje dhe nuk mund të ketë një shpejtësi më të madhe se sa shpejtësia që imponon kalimi me 2 korsi. Rruga mbrapa dhe rruga lart do të plotësojnë gjithë nevojat për një trafik më normal. Ndërkohë që në kohën e pikut bllokohen autostrada, jo më rrugët e qyteteve turistike që janë gjithmonë të rënduara nga trafiku”.
Por në këtë inspektim, Rama nuk përmendi ndonjë afat të caktuar se kur do përfundojë Lungomare, që për të, do e shndërrojë Vlorën në një prej qyteteve bregdetare më të bukura në rajon. /tesheshi.com/
