Akuzat dhe kundërakuzat për lidhje me trafikun e drogës në Shqipëri pritet të sqarohen në televizion nga ana e kryeministrit Edi Rama. Ky i fundit përmes një postimi në Twitter thotë se do të nxjerrë fakte kuptimplota live në TV, mirëpo nuk ka shtuar shumë detaje përvecse orës së saktë 11.30 të ditës së nesërme.
“Nesër në 11:30 të gjithë do të mund të shohin se kush e ka lejuar dhe kush e ka luftuar drogën në Shqipëri. Prova e fakte kuptimplota liveTv”, shkruan kryeministri.
Prej javësh tashmë në Shqipëri vlojnë akuzat dhe reagimet të nxitura nga kapja e një avioni të dytë me drogë në Itali, nisur nga Shqipëria. Kësaj ngjarjeje iu shtua edhe intervista e Zaganit, ish-drejtorit të Antitrafikut në Fier që implikonte edhe ministrin e Brendshëm, Saimir Tahiri.
Opozita ka bërë shumë akuza, të cilat kanë marrë përgjigje vetëm nga ministri Tahiri ose në rrugë institucionale. Tashmë, duket se në debat do të hyjë edhe Edi Rama, si e njofton vetë në Twitter./tesheshi.com/
