Lufta ndaj kultivimit dhe tregtimit të drogës në Shqipëri vijon të jetë prioritet për qeverinë.
Brenda muajit kryeministri Rama ka mbledhur Task-Forcën në Zyrën Operacionale duke kërkuar nga policia që të godasë kriminelët, jo bimët.
“Duhet të angazhohemi për të adresuar një shqetësim të opinionit publik që ka të bëjë me kthimin në përparësi absolute të goditjes së krerëve të këtyre grupeve kriminale dhe sekuestrimit të aseteve.
Policia e Shtetit ka bërë progres në këtë drejtim, gjatë këtyre 46 muajve që ne jemi në detyrë, por ne jemi të vetëdishëm se në kuadër të goditjes së kokave dhe sekuestrimit të aseteve ka shumë për të bërë.
Sigurisht që në vijim të suksesit të policisë në kushtet kur ky fenomen po çrënjoset nga harta në formën e bimës që nuk do të jetë më përmbajtja themelore e këtij fenomeni të matet me goditjen ndaj rrjeteve kriminale. Objektivi i parë themelor duhet të jetë në këtë proces pastrimi të territorit të bimëve, kriminelët pastaj bimët, jo bimët dhe pastaj shohim e bëjmë për kriminelët.”- tha ai.
Ashtu si herën tjetër edhe në këtë takim mungonte ministri i Brendshëm teknik, Dritan Demiraj, i vendosur në qeveri nga opozita pas marrëveshjes së 18 majit.
Ky takim vjen pas disa aksioneve të policisë, ku u zbulua sasi e madhe droge, rreth 15 ton, në një fshat të Vlorës dhe në kufi me Malin e Zi./tesheshi.com/
