Fjalimi i Ramës për 29 nëntorin, ishte një përzierjeje mes së djeshmes dhe të sotmes, sidomos pas ngjarjeve dramatike në Paris. Ai bëri një paralele mes luftës për liri dje kundër nazifashizmit, mes të sotmes kundër terrorizmit kur tha:
“Parafytyrimet që ushqen 29 nëntori i sotëm janë më të gjalla se të shumë 29 nëntorëve të shkuar. Pikërisht sepse sot ne ndjehemi të kërcënuar haptazi nga diçka fort e ngjashme, edhe më e errët sesa nazizmi, në formën e vet të organizmit dhe të shfaqjes nëpër trupin e botës së lirë. Prandaj dhe sot 29 nëntori duket ende më i çmuar, më frymëzues, më inkurajues, sesa ç’mund të na jetë dukur kur armiku i njerëzimit nuk ishte shfaqur ende me të gjithë egërsinë vrastare të vetëm dy javëve më parë”.
Sot, 29 nëntori nuk na e përçon vetëm ndjenjën e krenarisë dhe të respektit, për ç’ka ata bënë si shqiptarë duke çliruar dhe nderuar Shqipërinë, por dhe kurajën dhe forcën e shembullit që na nevojitet për të përballuar armikun e ri të jetës sonë prej njerëzish të lirë. Njësoj si atëherë kur mostra naziste u shfaq si gjer në dhëmb në rrugën e qytetërimit tonë edhe sot kur një tjetër forcë është shfaqur e armatosur me përçmimin më ekstrem të njeriut për vetveten. Sfida e këtij qytetërimi që i përkasim është të fitojë luftën pa humbur paqen”.
Për çdo 29 nëntor Rama organizon një pritje në kryeministri e mban një fjalim, ashtu siç të njëjtën gjë bën dhe presidenti mbrëmjen e datës 28. Ndërkohë, që kur ishte kryetar bashkie, 29 nëntorit Rama i ka dhënë dhe statusin e një feste të huazuar nga Franca, Nata e Bardhë, që për një pjesë të politikës dhe opinionit, është një sajesë e pagëlltitshme. /tesheshi.com/
