Kryeministri i përkohshëm i Maqedonisë, Emil Dimitriev ka refuzuar propozimin e partisë shqiptare në pushtet BDI për njërin nga emrat e propozuar për zëvendës ministër. Pra, bëhet fjalë për Bekim Maksutin.
Në propozimin për anëtarë të ri të Qeverisë, janë të gjithë emrat tjerë dhe biografitë e kandidatëve që ka propozuar Bashkimi Demokratik për Integrim, përveç të Bekim Maksutit.
Ashtu siç mësohet nga burime të afërta me pushtetin, thuhet që kryeministri i tanishëm Emil Dimitriev ka kërkuar refuzimin e Maksutit meqë ky i fundit në vitin 2012 në uniformën e ARM-së është përkulur përpara para përmendores së UÇK-së në Sllupçan, ndërsa asokohe Dimitriev ka qenë zëvendësministër i mbrojtjes. Kështu Dimitriev ka kërkuar procedurë disiplinore për Maksutin.
Nga BDI ende nuk kanë pranuar të prononcohen për këtë, duke thënë se situatën në fjalë do ta qartësojnë gjatë ditës së nesërme.
Rikujtojmë se Bashkimi Demokratik për Integrim në krye me Ali Ahmetin para disa ditësh ka marrë një vendim të befasueshëm duke ndërruar të gjithë kuadrot e vjetra në ekzekutiv, dhe të njëjtit janë zëvendësuar nga kuadro të rinj dhe jo shumë të njohur për opinionin e gjerë. /tesheshi.com/
