Enigma e fluturimit MH370 të kompanisë ajrore Malaysia Airlines duket se po shkon drejt zgjidhjes, për t’i dhënë fund një pritjeje të gjatë të familjarëve të 239 pasagjerëve dhe të personelit të avionit. Konfirmimi i sotëm i kryeministrit malajzian, Nexhib Rezakut, në Kuala-Lumpur se mbetjet e gjetura në një ishull të Oqeanit Indian i përkasin avionit të zhdukur 17 muaj të shkuar heq çdo dyshim mbi fatin e atij fluturimi. Eshtë thuajse e qartë tashmë se ai avion është rrëzuar.
Të afërmit e udhëtarëve të avionit të Malaysia Airlines-it patën kërkuar prej kohësh prova konkrete të asaj se çka ngjau me njerëzit e tyre, dhe një provë e tillë është tanimë pjesa e krahut të mjetit fluturues, e gjetur javën që shkoi në një plazh në ishullin La Reunion, pranë Madagaskarit.
Kryeministri tha këto fjalë në konfirmimin e së mërkurës, “Sot, 515 ditë që prej zhdukjes së avionit, duhet t’ju them zemërthyer se një ekip ndërkombëtar specialistësh ka konfirmuar në mënyrë përfundimtare se mbetjet e avionit të gjetura në ishullin Reunion janë vërtet nga fluturimi MH370.”
“Ne tani kemi prova fizike,” vijoi Nexhib Rezaku, “se, siç deklarova më 24 mars të vitit të shkuar, fluturimi MH370 ka përfunduar tragjikisht në jug të Oqeanit Indian.”
Me gjithë pohimin e mësipërm, ende mbetet e panjohur arsyeja që e bëri avionin e Malaysia Airlines-it ta ndryshonte drejtimin e fluturimit më 8 mars të një viti më parë.
Kreu i qeverisë malajziane nuk zbuloi diçka më tepër mbi përfundimet në të cilat kishin arritur ekspertët, por garantoi se do të vazhdonin përpjekjet për zbardhjen e së vërtetës, “Dua t’i siguroj të gjithë të prekurit nga kjo tragjedi se qeveria e Malajzisë është e angazhuar të bëjë gjithçka brenda mundësive të veta për ta zbuluar të vërtetën e asaj që ngjau.” /tesheshi.com/
