Kryeministri i kujton opozitës Vetingun: Çadra, bunkeri i frikës nga drejtësia

Kryeministri Edi Rama ka zgjedhur pikërisht ditën kushtuar drejtësisë që të çonte një mesazh për opozitën duke i kujtuar asaj frikën nga drejtësia, aludim për votën e munguar të opozitës në Kuvend për Vetingun.
Për këtë arsye Rama e quan çadrën e protestës së opozitës si “bunkerin e fundit të frikës nga drejtësia”
“Ju uroj gëzuar Ditën Kombëtare të Drejtësisë me këtë kartolinë të bunkerit të fundit të frikës nga drejtësia, ku janë ngujuar politikanë që për të bllokuar Vetingun dhe zbatimin e Reformës në Drejtësi, janë gati të na rindajnë për së gjalli nga Europa e të na kthejnë 20 vite pas, në vitin e mbrapshtë ’97.
Në këtë 104 vjetor të hedhjes së themelit të sistemit të drejtësisë shqiptare nga Qeveria e Ismail Qemalit më 10 maj 1913, shqiptarët janë më pranë se kurrë aspiratës së tyre shekullore për një Shqipëri me Drejtësi, Shtet, Punë, Mirëqenie; një Shqipëri që nis zbatimin e Vetingut dhe ulet në tryezën e negociatave për anëtarësim në Familjen Europiane”- shkruan Rama në facebook./tesheshi.com