Sulmi kimik i një jave më parë, shoqëruar me goditjen raketore amerikane, e kanë kthyer edhe njëherë Sirinë në qendër të vëmendjes, me konfliktin sirian si çështje qendrore në arenën ndërkombëtare.
Në një vizitë në Francë, Justin Trudeau ka deklaruar se për shefin e regjimit sirian nuk ka hapësirë në atë çka pritet të vijë në Siri me mbarimin e konfliktit.
“Mendoj se nuk ka diskutim që e ardhmja afatmesme dhe afatgjate e një Sirie paqësore nuk e përfshin më Bashar Assadin,” ka nënvizuar kryeministri kanadez gjatë vizitës së tij.
Ai ka patur të dielën një bisedë telefonike me kryeministren britanike, si dhe ka diskutuar ballazi me presidentin francez.
Për Trudeau-n ka patur diçka për të thënë dhe për Rusinë, duke theksuar se vendi i tij ishte gati që t’i shtonte sanksionet ndaj Moskës për shkak të mbështetjes së kësaj të fundit për regjimin e Assad-it.
“Jam i mendimit se Rusia duhet të ndërgjegjësohet për përgjegjësinë e saj në veprimet e përgjakshme javën e shkuar nga regjimi i Assad-it.”
Prej ditësh ka një presion të dukshëm ndërkombëtar ndaj Rusisë për të hequr dorë nga mbështetja për qeverisjen aktuale në Siri. /tesheshi.com/
