Justin Trudeau ka qenë shembull për mënyrën e trajtimit të refugjatëve sirianë që prej marrjes së detyrës së kryeministrit kanadez. Vendi i tij ka pritur me mijëra refugjatë sirianë, e vijon të presë të tjerë, duke u krijuar të tërë atyre mundësinë për t’u integruar në shoqërinë e re.
Kryeministri i Kanadasë e ka mbrojtur politikën e tij ndaj refugjatëve në një intervistë televizive të dhënë gjatë kësaj jave, duke e quajtur atë si “gjënë e drejtë për t’u bërë.”
Ai e ka hedhur poshtë në intervistën e tij idenë se pranimi në masë i refugjatëve sirianë nënkupton një portë të hapur për terrorizmin.
Trudeau do të theksonte në lidhje me këtë çështje tejet të ndjeshme: “Ne jetojmë në një botë ku ka gjithmonë rreziqe, dhe çështja është se sa ne duam të jetojmë me frikën nga këto rreziqe. Përgjigjja më e mirë ndaj llojit të radikalizimit dhe margjinalizimit që ne po shohim në pjesë të tjera të botës është të krijojmë një shoqëri përfshirëse, ku çdokush, duke përfshirë veçanërisht kanadezët muslimanë, të ketë mundësinë për të bërë përpara si çdo njeri tjetër.” /tesheshi.com/
