Hajdar el-Abadi u është drejtuar banorëve të Mosulit përmes valëve radiofonike, duke u premtuar se rimarrja e qytetit prej forcave të ISIS-it ishte pranë.
“Sot ne jemi pranë jush, dhe ju jeni pranë nesh, e fitorja është afër, me ndihmën e Zotit,” tha ai në radio për banorët e Mosulit.
Kjo ishte hera e parë që el-Abadi u drejtohej atyre, veçse nuk dihet se sa mund të jetë dëgjuar ai në qytetin që gjendet në duart e ISIS-it që prej vitit 2014.
“Sot ne po përparojmë, dhe nesër do të jemi së bashku fitimtarë. E atëherë kemi për të punuar së bashkur për të kthyer jetën, shërbimet dhe stabilitetin në çdo qytet dhe fshat.”
Iraku nuk e ka bërë ende të qartë kohën e nisjes së operacionit për rimarrjen e qytetit, por zyrtarë perëndimorë kanë lënë të kuptohet se veprimet ushtarake mund të fillojnë këtë muaj.
Kryeministri irakian u ka kërkuar gjithashtu banorëve të Mosulit të bashkëpunojnë me forcat e sigurisë, duke u thënë, “Sot ju jeni më pranë shpëtimit nga padrejtësia, tirania dhe mizoria e ISIS-it.”
Me nisjen e operacionit është paralajmëruar dhe një krizë humanitare, çka mund të sjellë dhe zhvendosjen e një milion personave. /tesheshi.com/
