“Ne ju premtuam çlirimin e Felluxhes, dhe e rimorëm atë. Forcat tona të sigurisë kontrollojnë qytetin, me përjashtim të disa xhepave të vegjël, që duhen pastruar brenda orëve të ardhshme,” deklaroi kryeministri irakian, Hajdar el-Abadi, në një fjalim të shkurtër drejtuar vendit dje në televizion.
Katër javë pas nisjes së sulmit për ta rimarrë Felluxhen, forcat irakiane njoftuan në orët e para të së premtes se kishin hyrë në qendër të saj.
Komandanti i operacionit do të thoshte për agjencinë e lajmeve AFP se forcat irakiane kishin marrë ndërtesën qeveritare në qendër të qytetit 50 kilometra në perëndim të Bagdadit.
Kontrollin e qytetit nga forcat qeveritare e simbolizon tashmë një flamur në krye të asaj ndërtese.
Felluxhe do të binte në duart e ISIS-it dy vite të shkuara, disa muaj përpara se të merrej dhe Mosuli.
“Felluxhe i është kthyer vendit, dhe Mosuli është beteja e ardhshme,” do të shtonte kryeministri irakian në Twitter. /tesheshi.com/
