Chiril Gaburici, kryeministri i Moldavisë, shpjegoi në një konferencë shtypi të premten se e mori vendimin për të dhënë dorëheqjen pas debateve mbi diplomën e tij, dhe se vendosi ta bënte këtë lëvizje të paprecedent për t’i dhënë mundësi vendit të tij të përqendrohej në problemet reale.
Gaburici u paraqit të enjten në zyrën e prokurorit të përgjithshëm për t’u pyetur në lidhje me diplomën me të cilën ishte regjistruar në universitet.
Skandali për diplomën e tij të shkollës së mesme shpërtheu në prill, kur mjetet moldave të informimit pretenduan se ajo ishte e rreme.
Kryeministri i dorëhequr shprehu keqardhjen që diskutimet mbi studimet e tij ishin bërë instrument i lojës politike. Një afarist proeuropian dhe kandidat i Partisë Liberaldemokrate, ai u bë kryeministër në shkurt të këtij viti.
Në fillim të kësaj jave ai i kërkoi prokurorit të shtetit dhe kreut të Bankës Qendrore të jepnin dorëheqjen pas dështimit për të vepruar siç duhet në lidhje me zhdukjen e një miliardë dollarëve nga tre banka të Moldavisë. /tesheshi.com/
