Viktor Orban, i njohur për qëndrimin e ashpër kundër emigrantëve gjatë krizës së refugjatëve, është shpërblyer në Poloni me çmimin “Njeriu i Vitit”. Çmimi i dhënë në një forum ekonomik i kushtohet ndikimit të tij në trajtësimin e politikës së Europës Qendrore.
Çmimi i është dhënë Orban-it nga kryeministrija polake, Beata Szydlo. Në fjalën e tij, kryeministri i Hungarisë tha se Grupi i Visegradit, i përbërë nga Çekia, Hungaria, Polonia dhe Sllovakia, mund të bëhet një forcë shtytëse në BE pas vendimit të Britanisë për të dalë nga unioni europian.
Ai premtoi më herët nisjen e një kundërrevolucioni kulturor brenda BE-së dhe ndjekjen e një vizioni krejt të ndryshëm mbi të.
“Brexit-i është një mundësi fantastike për ne. Ne jemi në një moment historik kulturor. Ekziston pikërisht tani mundësia e një kundërrevolucioni kulturor, ” deklaroi Orban.
Gjatë fjalës në forumin ekonomik, Viktor Orban kritikoi mënyrën si u trajtua kriza e refugjatëve nga BE-ja. Kryeministri hungraez e vuri theksin te eliminimi i identiteteve historike nga vërshimi i pandalshëm i refugjatëve dhe emigrantëve.
“Ata që vijnë në Europë kanë identitete më të fuqishme se europianët, e gjithnjë e më shumë krijojnë ishuj të izoluar kulturorë në shoqëritë europiane,” tha ai.
Një ide e parashtruar prej tij në forumin ekonomik ishte dhe ajo e “patriotizmit ekonomik.”
Viktor Orban e qeveria e tij kanë mbajtur që në krye të herës një qëndrim të ashpër ndaj refugjatëve, duke e bllokuar dhe kufirin hungarez. Një pengesë e dytë planifikohet të ngrihet në kufirin me Serbinë, përpos 3.000 ushtarëve të tjerë që do të dërgohen për ruajtjen e tij. /tesheshi.com/
