Mark Rutte, kryeministri i Holandës, vendit që ka presidencën e BE-së, ka deklaruar sot se Bashkimi Europian nuk ka alternativë tjetër, veçse të nënshkruajë marrëveshjen me Turqinë për ta frenuar krizën e refugjatëve.
“Nuk ka alternativë, ne do të vijmë te një marrëveshje,” u tha ai sot gazetarëve. “Në të kundërt, situata në Greqi do të mbetet shumë serioze. Eshtë shumë e rëndësishme që të arrijmë në një marrëveshje tani dhe nesër.”
Me marrëveshjen, ende në tavolinë, jo të miratuar, Turqia do t’i marrë të gjithë emigrantët që arrijnë në ishujt grekë. Në shkëmbim, BE-ja, për çdo refugjatë sirian të kthyer në Turqi, do të marrë për ta risistemuar një refugjat sirian nga kampet turke.
“Ajo çka duam qartësisht është që të ndalojnë kalimet, sepse ne po i kthejmë njerëzit në Turqi. Ne shpresojmë që kjo do t’i ndalojë kalimet brenda tre apo katër javëve,” deklaroi Rutte.
Në këndvështrimin e tij, ndërprerja e valës së refugjatëve që kalojnë nga Turqia në Greqi përmes Egjeut, e më pas përmes Ballkanit drejt Europës, do të ndihmojë në uljen e numrit të atyre që e lënë Sirinë.
Në lidhje me marrëveshjen e Turqisë me BE-në për refugjatët, kanë qenë të shumta reagimet ndërkombëtare, ku ka pasur zëra pro dhe kundër. Fati i marrëveshjes nuk është ende i ditur. /tesheshi.com/
