Përputhje mendimesh për ndryshimet që duhen bërë në politikën e emigracionit të Bashkimit Europian, është evidentuar në deklaratat që bënë pas takimit të tyre, kryeministri Aleksis Tsipras dhe komisioneri europian, Dimitris Avramopulos.
Tema kryesore e bisedimeve kishte të bënte me rishpërndarjen e flukseve të emigrantëve dhe në këtë kuadër ndryshimet eventuale në marrëveshjet Dublin I dhe Dublin II, ndërsa i përbashkët ishte edhe qëndrimi për solidaritet ndaj vendeve të Jugut europian që ndeshen me flukset më të mëdha të emigracionit.
Tsipras vuri në dukje nevojën e hartimit të një strategjie kombëtare për përballimin e problemit të emigracionit, pa spekulime partiake, të cilat do të forconin retorikën e ekstremit të djathtë, Agimit të Artë dhe neonazistëve.
Avramopulos vuri në dukje shqetësimin e madh që dominon në radhët e BE, duke kërkuar njëkohësisht nga qeveria greke që të bëjë hapa drejt përshtatjes së politikës së vet në këtë çështje.
Kryeministri dhe komisioneri europian iu referuan edhe negociatave që po zhvillohen me partnerët institucionalë. Tsipras deklaroi se negociatat po zhvillohen dhe po maturohen, tha se kishte marrë një mesazh miqësie nga presidenti i Komisionit Europian Juncker dhe se shkëmbeu mendime me zotin Avramopulos me qëllim që të negociatat të kenë rezultate të kapshme./tesheshi.com/
