Bernard Cazeneuve ka reaguar pas kritikave të Donald Trump-it për NATO-n, duke nënvizuar nevojën e Europës për një mbrojtje të pavarur.
Kreu i qeverisë franceze ka bërë thirrje për krijimin e një sistemi të pavarur mbrojtjeje në Europë. Një reagim që vjen pak pasi presidenti i zgjedhur amerikan, i cili e merr detyrën pas dy ditësh, e quajti NATO-n një organizatë të vjetëruar, që i ka ikur koha.
Cazeneuve e kërkon krijimin e një sistemi të pavarur mbrojtjeje për t’i shpëtuar varësisë nga Uashingtoni për sigurinë në kontinent.
“Ne kemi nevojë për mbrojtje europiane, me mjete europiane, me investime europiane, me një kapacitet europian projektimi që do t’i bëjë të pavarur BE-në, popujt dhe kombet që e përbëjnë atë,” do t’u thoshte ai një ditë më parë ligjvënësve në Asamblenë Kombëtare.
Kjo pavarësi nga Uashingtoni, sipas tij, do të afirmonte parimet europiane, vlerat dhe identitetin europian.
Reagimi i kryeministrit francez pason atë të presidentit të Francës, Francois Hollande, që do të deklaronte se BE-ja nuk kishte nevojë për këshilla nga jashtë mbi atë se çka duhet të bëjë, si kundërpërgjigje ndaj kritikave të Trump-it për politikat europiane. /tesheshi.com/
