David Cameron ka bërë të hënën një vizitë surprizë në kampet e refugjatëve sirianë në Liban dhe Jordani, me synimin për ta parë nga afër gjendjen e tyre.
Vizita pasoi caktimin prej tij të një ministri që do të merret posaçërisht me mbikëqyrjen e risistemimit në Britani në pesë vitet e ardhshme të 20.000 refugjatëve sirianë nga kampet e Lindjes së Mesme.
Cameron deklaroi se kërkonte t’i shihte e t’i dëgjonte vetë historitë e refugjatëve, si dhe të mësonte prej tyre se ç’u nevojitej.
Në vizitën e tij ishte paraparë dhe një takim me kryeministrin libanez dhe me mbretin e Jordanisë. Ndërkaq, zyra e kryeministrit britanik bëri të ditur me hollësi se si do të shpenzoheshin 100 milionë paundë shtesë në ndihmën britanike për refugjatët sirianë.
Kryeministri do të shkruante në adresën e tij në Twitter gjatë vizitës në kampet e refugjatëve, “Jam në një kamp refugjatësh në Liban, duke dëgjuar disa histori pikëlluese.” Ai do të deklaronte se Britania është tashmë dhuruesja e dytë më e madhe për kampet e refugjatëve sirianë në rajon.
Shtimi i ndihmës ishte një prej premtimeve të Cameron-it. Kështu ai njoftoi se Britania do ta dyfishonte mbështetjen për shkollat libaneze, në 20 milionë paundë në vit për tre vitet e ardhshme, për t’i ndihmuar fëmijët sirianë dhe libanezë.
Presioni brenda dhe jashtë Britanisë ndaj David Cameron-it për t’u përfshirë më tepër në përpjekjet për zgjidhjen e krizës së refugjatëve ka qenë tepër i madh, gjë që e ka detyruar atë të ndërmarrë një sërë veprimesh konkrete në këtë drejtim, siç ishte dhe vizita e djeshme. /tesheshi.com/
