David Cameron, kryeministri britanik, ka deklaruar të hënën se femrat muslimane duhet ta përmirësojnë anglishten e tyre, ndryshe ca mund të përballen me largimin nga vendi.
“Nuk mund të garantoni se do të jeni në gjendje të qëndroni nëse nuk përmirësoni gjuhën. Njerëzit që vijnë në vendin tonë kanë gjithashtu përgjegjësi,” ka thënë Cameron.
Kryeministri britanik u zotua se qeveria e tij do të financojë klasat e mësimit të anglishtes për emigrantet. “Për momentin dikush mund të vijë këtu me një anglishte të dobët, dhe nuk ka kërkesa për ta përmirësuar atë me kohë. Ne do ta ndryshojmë këtë. Nëse nuk e përmirësoni rrjedhshmërinë tuaj në të folur, kjo mund të ndikojë në mundësinë për të qëndruar në Mbretërinë e Bashkuar. Kjo do të ndihmojë që t’u bëhet e qartë atyre burrave që i pengojnë partneret të integrohen se këto janë pasojat.”
Qeveria britanike çmon se rreth 190.000 femra muslimane në vend, rreth 22 për qind e numrit të përgjithshëm, dinë pak ose aspak anglisht. Me propozimin e fundit synohet të luftohet izolimi shoqëror e diskriminimi.
Iniciativa e kryeministrit britanik është pritur me kundërshti nga grupet muslimane, duke e cilësuar atë si stereotipizuese e denigruese. /tesheshi.com/
