Kryetarja e LSI-së Monika Kryemadhi e cilësoi programin e qeverisë “Rama2” si bosh dhe me batuta. Kryemadhi ironizoi madje qeverinë duke thënë se nuk kanë pasurkohë të shkruajnë, pasi edhe kjo fletëpalosje që na është dhënë ka gabime dhe lajthitje.
“Kryeministri është kujdesur që programit t’i qepë një kostum të ngushtë që e quan qeveri të vogël. Është kujdesur të shkatërrojë edhe debatin për programin duke mos paraqitur një program qeverisës të mirëfilltë me parimin si të mos flasim për diçka që nuk ekziston. Pavarësisht pozicionit tonë opozitar do të donim të diskutonim mbi një program të mirëstudiuar. Vërtetë s’kemi parë asgjë akoma, por as ai s’ka parë asgjë akoma”, tha Kryemadhi.
Në vijim ajo shtoi se si mund të krenohet një qeveri me një rritje ekonomike bombastike kur të ardhurat në xhepat e qytetarëve shqiptarë janë si 10 vjet më parë?
“E vërteta është që rritja ekonomike në këto vite ka qenë më pak se inflacioni, thënë ndryshe shqiptarët janë varfëruar. Shqiptarët blejnë më pak sepse paraja ka rënë”, deklaroi Kryemadhi./tesheshi.com/
