Shqipëria është në një udhëkryq pasi gjërat ende nuk janë të qarta. Kështu u shpreh kryetarja e LSI-së, Monika Kryemadhi, duke folur para të rinjve të LRI-së në kampin veror të Jalës.
“Kemi një qeveri që nuk e dimë se çfarë është, sepse ka ministra të PD, PS dhe LSI. Kemi nje parlament që do te mblidhet pas disa javësh, pra kemi një situatë ku nuk kemi një objektiv, nuk kemi një qellim”, u shpreh Kryemadhi.
Në vijim ajo u kërkoi të rinjve dhe të rejave të jenë aktivë, pasi Shqipëria ka nevojë për ta, e sidomos për një forcë që kujdeset për të varfërit.
“Sot po jetojmë mbi mashtrimin, ashtu si në diktaturë kur mendonim se ishim të pasur, por në fakt ishin të varfër. Ashtu si në ’92, të rinjtë u lipset të mos jenë indiferentë por të ngrenë zërin. Ne nuk kemi frikë nga gabimet që kemi bërë kur ishim në qeveri.
Ne nuk kemi kompleksin të kërkojmë falje. Të rrëzohesh do të thotë të ringrihesh.
Ne sot në pozicionin si opozitë nuk i përsërisim më gabimet por marrim përsipër të bëjmë luftë frontale kundër padrejtësive”, u shpreh ajo. /tesheshi.com/
