Nga Blendi Gashi
Sistemi shëndetësor që nga paslufta pothuajse është udhëhequr nga Lidhja Demokratike e Kosovës me përjashtim që për disa vite u drejtua nga kreu i Partisë së Drejtësisë, Ferid Agani.
Ky sistem përveç atij të drejtësisë shihet si më i dështuari në Kosovë. Se shëndetësia kosovare është një dështim i madh e ka pranuar edhe kryetari i Kuvendit Kadri Veseli. Këtë deklaratë e bëri kreu i ri i PDK-së gjatë një takimi që zhvilloi këtë javë me përfaqësuesit e një grupi specializantësh të mjekësisë.
“Ne kemi mjekë të shkëlqyeshëm, profesionalisht të barabartë me kolegët e tyre ndërkombëtarë, të përkushtuar maksimalisht në misionin e shenjtë të mjekësisë, por po i humbim këta mjekë për shkak të një sistemi të mbrapshtë e të dështuar të shëndetësisë. Është moment i fundit që të ndërhyjmë dhe t’i japim fund keqmenaxhimit dhe improvizimit në mjekësinë kosovare”, tha kryeparlmamentari Veseli.
Kjo deklaratë e kryekuvendarit është bombë në drejtim të LDK-së, parti kjo e cila që nga paslufta më së shumti ka drejtuar këtë dikaster të rëndësishëm.
“Mjeku i LDK-së”, Haxhi Avdyli i reagon kryekuvendarit Veseli
I vetmi zyrtar i LDK-së që ka reaguar ndaj deklaratës së kryeparlamentarit Veseli, është doktori nga Prizreni, Haxhi Avdyli, që është kryetar i Degës së LDK-së.
Avdyli ka shtruar pyetjen pse kryekuvendari Veseli duhet të merret me shëndetësinë kur Ministria e Shëndetësisë edhe me një buxhet më të vogël po mundohet të bëj punën e saj?!
“Ndoshta do ishte mirë që ai të merret më shumë me sistemin e dështuar të parlamentit ku deputetë kryesisht të PDK-së nuk po i vijnë në seanca për të cilët paguhen. Dhe përmes ligjeve të mira dhe punës efektive të parlamentit të ndikoj në permiresimin e sistemit shëndetësor dhe rritjes së financimit për shëndetësi. Sidoqoftë sistemimi i i specialistëve të papunë duhet të ndodh sa më shpejt ,për të cilën ka investuar shumë familja dhe shteti. Prandaj është detyrë e qeverisë e jo e kuvendit të gjej zgjidhje sa me shpejtë që këtyre mjekëve tu kthehet dinjiteti i merituar…”, ka shkruar Avdyli në Facebook.
Bekim Haxhiu i PDK-së, mbi një vit kërkon dorëheqjen e ministrit Rrahmani
Por, jo vetëm Veseli por edhe deputeti i PDK-së, Bekim Haxhiu, ka kohë që bën gjendjen e shëndetësisë drejton gishtin kah partneri i koalicionit, LDK, konkretisht nga ministri aktual i Shëndetësisë, Imet Rrahmani.
Deputeti Haxhiu ka më shumë se një vit që ai po kërkon dorëheqjen e ministrit Rrahmani, ose shkarkimin e tij.
Sipas Haxhiut, ministri nuk ka mundur të zgjidhë problemet që janë në sistemin shëndetësor në Kosovë, pavarësisht kritikave.
Ai vlerëson se gjendja në shëndetësi kurrë nuk ka qenë më keq dhe më alarmante, për ç’shkak edhe mjekët më të mirë po ikin nga Kosova sepse nuk ka politikë kadrovike për ta.
E ministri i cili po kritikohet për gjendjen e rëndë të shëndetësisë, Imet Rrahmani ka deklaruar se nuk është faji i tij për këtë gjendje, por e politikës e cila është bërë rreth menaxhimit të këtij sektori.
Ai kishte thënë që nuk duhet pritur mrekulli për zgjidhjen e problemeve, pasi që, sipas tij, këto probleme të shkaktuara tash e 16 vite nuk mund të zgjidhen me shkop magjik. /tesheshi.com/
