Ministrja e Punëve të Jashtme të Gjermanisë, Annalena Baerbock, para vizitës së saj në Slloveni tha se vendet e Ballkanit Perëndimor i përkasin plotësisht Bashkimit Evropian dhe se synimi i Gjermanisë është forcimi i BE-së, ku do të përfshihen edhe vendet e rajonit.
“Në një botë ku krizat dhe konfliktet mbivendosen në fqinjësinë e afërt të Evropës, ne kemi nevojë për një Bashkimi Evropian që do të veprojë shpejt dhe me vendosmëri nesër dhe pasnesër dhe të mbetet një spirancë sigurie për të gjithë ne në Evropë. Gjermania dhe Sllovenia janë të bashkuara në forcimin e Evropës sonë të përbashkët, duke e bërë atë të përshtatshme për të ardhmen dhe duke përfshirë në mesin tonë vendet e Ballkanit Perëndimor. Për ne, një Bashkimi Evropian i fortë, ashtu si NATO, është sigurim i pazëvendësueshëm i jetës në kohë të pasigurta”, thuhet në deklaratën e Baerbock të publikuar në faqen e Ministrisë së Jashtme gjermane.
Ajo tha se vendet e Ballkanit Perëndimor i përkasin “plotësisht dhe absolutisht” Bashkimit Evropian.
Interesi sigurie
“Këto nuk janë vetëm fjalë boshe. Është në interesin tonë të sigurisë – në Lubjanë, në Berlin dhe në të gjithë Evropën. Për të arritur këtë, duhet të kryhen reformat e nevojshme në vendet që dëshirojnë të bëhen pjesë e familjes evropiane. Në të njëjtën kohë, BE-ja duhet ta mbajë fjalën dhe të ndërmarrë hapa në procesin e zgjerimit, kur të jenë kushtet e duhura”, tha Baerbock.
Ajo shtoi se për shkak të “imperializmit rus në zemër të Evropës”, BE nuk mund të përballojë “zona gri”.
“Së bashku me Slloveninë po punojmë për reforma në BE në mënyrë që të vendosim një kurs për një Union të zgjeruar. Progresi në politikën e zgjerimit dhe reformat e brendshme të BE-së duhet të ecin paralelisht”, theksoi shefja e diplomacisë gjermane. /tesheshi.com/
