Holanda është një tjetër vend veç Gjermanisë dhe Austrisë ku shtetarët turq janë ndaluar të zhvillojnë tubime me bashkatdhetarët e tyre në kuadër të fushatës për referendumin e 16 prillit.
Së fundmi, ministrit të Jashtëm turk i është kujtuar nga figura politike holandeze se nuk është i mirëpritur për një aktivitet të ngjashëm në vendin e tyre.
Një përkujtesë që Mevlüt Çavuşoğlu e ka pritur në mënyrë sfiduese, duke paralajmëruar dhe sanksione nëse ai pengohet që të udhëtojë drejt Holandës e të ketë aktivitete atje.
Çavuşoğlu ka folur sot për televizionin CNN Türk, duke nënvizuar me ton të ashpër: “Tani është Holanda. Holandezi (Geert) Wilders vepron si një nazist. Ai kërcënon ministrin e jashtëm të Republikës Turke me moslënie të avionit që të ngrihet. Por unë do të shkoj sot. Nëse Holanda ma anulon fluturimin, atëherë do të vëmë sanksione të rënda.”
Ishte vetë kryeministri holandez që dy ditë më parë deklaroi se Çavuşoğlu nuk ishte i mirëpritur. “Nëse vini,” tha ai, “nuk do të keni makinë me shofer, nuk do të keni shoqërues, as mbështetje.”
Si një zhvillim i fundit, i njëjti televizion turk sapo lajmëron se leja e fluturimit për shtetarin turk është anuluar.
Përkundër flamurit të mbajtur për fjalën e lirë e për lirinë e shprehjes, pengimi i takimeve të qeveritarëve turq me komunitetet e tyre në këto vende është rrjedhojë e një qasjeje antiturke prej kohësh. /tesheshi.com/
