Kreu i diplomacisë ruse në Tiranë, ambasadori Alexander Karpushin, e ka quajtur pabesi, madje si “thikë pas shpine”, aktin e forcave ajrore turke që rrëzuan avionin e tyre ushtarak ditë më parë. Ai ka shmangur idenë e një lufte të mundshme me Turqinë, por ka thënë se Moska pret që Ankaraja të kërkojë të falur, si kusht për stabilizimin e marrëdhënieve.
Ky akt është marrë nga shtet që ka interesa në rajon. Turqia nuk ka ndërmarrë asnjë akt drejt zbutjes së tensioneve. Ankaraja nuk ka tentuar të na njoftojë urgjentisht për këtë ngjarje. Por thirri një mbledhje të jashtëzakonshme të NATOs. Nuk kemi marrë asnjë ngushëllim nga Turqia deri më tani, dhe nuk na është kërkuar falje. Arroganca e liderëve turq nuk e qetëson aspak situatën. Vetëm nëse kërkohet falje mund të normalizohen marrëdhëniet”, tha Karpushin për News 24.
Sakaq, Ankaraja zyrtare ka deklaruar më shumë se një herë se nuk ka përse të kërkojë falje, derisa është vërtetuar që avioni rus shkeu hapur hapësirën ajrore, edhe përkundër paralajmërimeve për të mos e bërë këtë. Por diplomacia turke ka shprehur keqardhje për atë që ndodhi. /tesheshi.com/
