Kreu i diplomacisë gjermane, Sigmar Gabriel deklaroi së fundi gjatë një vizite në Prishtinë se pa e njohur Kosovën, Serbia nuk ka vend në BE.
“Ne edhe në Beograd kemi theksuar se nëse Serbia dëshiron të shkojë në drejtim të BE-së duhet t’i plotësojë kriteret e shtetit ligjor, natyrisht edhe pranimin e pavarësisë së Kosovës. Ky është një parakusht për rrugën e tyre në BE. Për këtë ju mund të llogarisni mbështetjen tonë”, tha Gabriel, gjatë një dalje për shtyp me kryeministrin Haradinaj.
E ndërkohë, njeriu i Merkelit, tha se po punohet me 5 vende të BE-së që ende nuk e kanë njohur Kosovën, që ta bëjnë gjë të tillë. Por nga ana tjetër, Garbriel kërkoi që politika kosovare ta mbyllë çështjen e demarkacionit me Malin e Zi, e të tërhiqet nga zhbërja e Speciales.
“Ne angazhohemi që Kosova të përgatitet për çështje jo të këndshme dhe një nga këto është Gjykata Speciale. Unë jam i lumtur që kam dëgjuar se ka vullnet për t’u zgjidhur edhe çështja e demarkacionit me Malin e Zi. Ne e mbështesim edhe këtë, sepse është në të mirë të qytetarëve të Kosovës, në mënyrë që ky kriter të plotësohet dhe të ketë liberalizim të vizave”, tha kreu i diplomacisë së Berlinit. /tesheshi.com/
